Arrincando o "Celtenario"

Este pasado venres 13 de xaneiro, pegouse o chupinazo do centenario celeste no encontro que nos medía co Vilarreal de Quique Setién. Dende primeira hora da tarde, na explanada de Tribuna, inchables para os máis cativos, así como bufandas conmemorativas de agasallo para os mesmos (chouripán no interior de dita bancada), pinchadiscos, como teloneiros do mellor...

Ese combo co concerto de Keltoi, onde o persoal foi quecendo ó son dos seus temas para o recibimento. Posta en escena das novas bandeiras da agrupación (imaxe superior). O resultado non foi o mellor, pero tal como catalogou o día un referente da centolada, sí o foi o celtismo. E nestes tempos convulsos entre pulsos con xogadores e políticos, e despidos de quén trata de recobrar vellas sensacións, esquecemos o principal.

Un saúdo dende o fondo da ría.

Fin do calvario e novidades

Estamos de novo por estes lares, Centolos, logo de rematar este domingo unha tempada que non se antollaba tan agónica como o foi nos derradeiros minutos de competición. Un gol local na capital puido mandarnos á Segunda División despois de oito tempadas. E todo volvía estar ó noso favor, xa que dependiamos dunha vitoria sobre un conxunto descendido para non pasar apuros, pero ó igual que fronte ó Raio Vallecano a tempada anterior, non a acadamos.

Troco de cabeceira, nun dos derradeiros eventos

Cuartos no torneo da FdP, paparota peñista e vitoria perante o Barça

Comezou cargado o mes de maio para o celtismo en xeral e para a centolada en particular, nestes primeiros catro días do mes das flores. Vontade de samba no prado de Guizán o mércores pola mañá, apisonadora zoqueira na Madroa nesa mesma tarde. E o pasado sábado, Convención da FdP e vitoria determinante fronte o campión de Liga.

Combinado amarelo da Fase Final 18-19

Doce valentes deron o visto bo pra participar na liguiña de grupos da Fase Final (foto superior), que se iniciaba para os combatentes amarelos na alfombra do campo de fútbol de Santiaguiño, sito na parroquia mosense de Guizán. Arrincaba a mañá coa neveira cargada de cervexa sobrante da viaxe a Pucela e coa obriga de gañar no primeiro envite fronte ós compañeiros de Terra Celeste, que noquearon no primeiro xogo da solleira mañá ós rapaces de Caldeirada Sideral por 4-2.

E o combinado crustáceo, cumpriu co cometido -remontada incluida dun 1-2-, tras adiantarse tamén no marcador e igualar o tanteo do encontro precedente entre os outros 2 participantes do grupo (4-2). Medio choio estaba feito, só restaba por acadar un punto fronte á nova agrupación federada a finais de 2016. E tal como dixo o noso CM na conta de Twitter, o abultado marcador final (10-5, á nosa prol), reflicte un engadido no transcurso do mesmo "Os porteiros acordaron quedar na cantina e botar uns futbolíns". Abafante calor, que pesou nas pernas e na cachola dos afoutos xogadores de ambos bandos.

Compartindo mesa desta volta con Le-Chuzas e os de Iago Aspas

Obxectivo cumprido, os nosos daban boa conta da paparota de balde habitual nun coñecido establecemento da parroquia olívica de Candeán. E como sempre, o de sempre... e iso fixo estragos nalgún que foi pacer e sestear no rectángulo de xogo dun dos tapetes da Madroa. Enfronte, unha escadra que habitúa a desputar estas lides, con moito home de rutina balompédica nas súas pernas e indo a remolque dende os comezos, acabamos cedendo por un impoñente 4-10 e dando por rematada a nosa xornada de convivencia cos peñistas participantes nesta cita anual.

Acto seguido, revalidaban entorchado os amigos de Boinas Celestes, que superaron noutro encontro cheo de ocasións e de dianas por 11-8 ós porriñeses de Zoqueiros. Segunda participación do colectivo nado en 2017 e pleno de victorias. Non se coñece mellor arranque.

Cambiando de terzo e trocando fútbol de afeccionados polo profesional, chegamos ó mediodía deste pasado sábado, na que no Hotel Coia celebrouse a XXII Convención da Federación de Peñas Celtistas, na que Centolos Celestes abriu a recolleita de galardóns, por mor do cuarto posto acadado a media semana no torneo federativo. Asomaba unha boa xornada que se antollaba como letal no devir céltico de cara á vindeira tempada. 

Como reza un dos cánticos celtistas "un sábado de maio..." e coincidindo co segundo aniversario dunha data que se lembrará sempre como o comezo do "This is afouteza", na ida das semifinais contra o Manchester United de Mourinho e Pogba, outra gran tarde acontecería no vello Balaídos coa vitoria 2-0 contra un Barcelona que viña campión, ó que se lle fixo un singular corredor a xogadores de segunda ringleira do clube catalán. Custou, pero a porta de Rubén Blanco quedou sen perforar ante un equipo de gran calado e a exaltación, brotou ó remate do encontro no feudo olívico, cos xogadores locais voltando dos vestiarios para agradecer a enfervorizada afección. Previamente outro recibimiento polo Val do Fragoso quecía gorxas, a ritmo de cervexa e choripáns de balde na enésima man aberta do clube neste mes e medio. Os resultados do domingo foron dispares e fan que o Celta precise un derradeiro empurrón para seguir na elite do fútbol español. Quén sabe se chegará en San Mamés ou tocará agardar á visita do descendido Raio.

Por Hugo Estévez.

A Nosa Reconquista. Eu Acredito.

30 de marzo de 2013. O inesquecible Natxo Insa abre a lata, fronte ó que viría sendo o futuro campión de Liga, no minuto 38. Tello e Messi voltearían o tanteo. E o daquela capitán Borja Oubiña -50 minutos despois da diana do alacantino- axustaría un firme testarazo ó pau longo para obter un punto que na definitiva sería vital, e que facía de Balaídos un explosor de xúbilo. Logo virían 4 vitorias, 1 empate e 4 derrotas nas 9 finais restantes.

30 de marzo de 2019. Comezaría a xornada sabatina cunha degustación do típico choripán e outros praceres gastronómicos nas rúas do Vigo vello. Todo con azo de coller folgos para o que se aveciñaba no Val do Fragoso durante a calorosa tarde do derradeiro sábado marzal. Lanzadeiras de balde, cada moi pouco, para todo o celtista que se atopaba nos arredores da Laxe na festividade olívica. Capítulo intrínseco da viaxe cara o coliseo vigués e a que será unha lembranza como o talismán que foi Martín Camaño nunha terraza da contorna de Praza América, no paso dos primeiros autobuses da sobremesa, que tanto xogo deu nos grupos de Whatsapp da peña.

O héroe do celtismo (vía La Casa Del Fútbol)

O clásico recibimento ó equipo estaba programado para as 16,30 horas, pero como adoita ser habitual, a chegada dáse con hora e media de antelación ó asubío inicial do choque e preto das 17 horas aparecía o bus da expedición céltica no estadio municipal. Unha das mellores agardas da enfervorizada parroquia celeste dos últimos tempos, con charanga incluida, coma principal novidade.

Co traballo de arrufaxe feito, a pelota pasaba ó tellado dos xogadores, focalizado nun home vital, ó que lle caiu a primeira ovación da tarde, nada máis abandonar o autocar pra adentrarse no noso templo. Os seareiros celestes alentaron sen cesar nos prolegómenos do vida ou morte, sabedores do papel primordial que executaba o xogador número 12 (claro está que non incluimos a Wesley).

Todo semellaba finiquitado co 0-2 do Vilarreal ó cuarto de hora. Balaídos tinguíase dunha atmosfera lúgubre, con tímidos e illantes folgos e cánticos de forza ós seus, durante case tres cuartos de hora. Todo trocou co paso polos vestiarios e tralo lecer xurdiu o príncipe das bateas, cun libre directo con 12 homes na barreira en total, que non parecía que fose rematar nas mallas. Maxi Gómez acadaba a igualada cun bo servizo do debutante Olaza e Iago faría doblete coa pena máxima sinalada con suspense.

As mágoas da tensión prolongada (@AbrahamRomero)

No inicio do desconto sería sustituido por outro home importante na salvación do 2013, Gustavo Cabral, coa pertinente atronadora ovación do presente do coliseo vigués ó seu home franquicia e fundíndose en bágoas inconsolables no banco -imaxe superior-. Esas bagullas son as nosas, por este primeiro trimestre do ano insofrible no que a túa ausencia enviounos a unha posición na que como tí dis, non deberiamos de estar. 

Como nas grandes ocasións, o equipo respostou tanto dentro como fora do campo, voltando de vestiarios para agredecer ós seus de todo o esforzo da tarde e das dúas semanas previas para darlle colorido e un cheo a Balaídos, que foi chave no acadado, como primeira pedra do trabado camiño final.

¡SÍ SE PODE!

Por Hugo Estévez

Centolos Celestes, na Fase Final do XXII torneo da FdP

Centolos Celestes, certifica a súa presenza por quinta edición consecutiva na Fase Final do Torneo das Peñas do Celta, que se desputará no vindeiro 1 de maio de 2019. Non dispensan dun mes das flores dende que no Penedo da Moo en 2013, a extinta Lío en Río e Irmandiños, derrotáronos pola mínima e botáronos do pachangueo celtista ás primeiras de cambio.

Centolos Celestes, na Fase Final do Torneo de Peñas 2017/2018

Este pasado xoves 12 de outono, xogábase a primeira fase do torneo das peñas do Celta da presente tempada, na que o combinado amarelo acadou a súa cuarta participación consecutiva na Fase Final dos envites entre agrupacións celtistas. Non fallan á cita, dende que no Penedo da Moo en decembro de 2013, foran desbancados por Lío en Río e Irmandiños, con derrotas pola mínima ante os mesmos.

Combinado primeira fase, 2017-2018

O emprazamento dos encontros, foi como na precedente Fase Final matutina, no campo do Meixoeiro. Encadrados no grupo A, xunto con Merlegos, Celtabirras e Boinas Celestes -que desfrutaba da súa primeira cita deste calado-. Destacar que o bloque que se alzou coa coroa no pasado maio acodeu mermado, con case unha decena de notables baixas -imaxe do equipo, arriba, con alguna ausencia-.

O primeiro encontro foi unha igualada sen goles ante os Celtabirras, quénes foron mellores sobre o tapete e non levaron a vitoria de miragre, xa que no primeiro tempo estrelaron un balón lonxano no longueiro e minutos antes cruzaran sorprendentemente un balón fora, de empuxares a porta baleira. Acto seguido, Merlegos sería o rival batido por Boinas Celestes (3-0) e Celtabirras (6-2).

Chegaba a nosa segunda quenda, perante os rapaces de Boinas Celestes, nun partido moi desputado na franxa central e sen ocasións de perigo en ningún dos dous marcos. Como non, outro 0-0 pro casilleiro. Púñase todo de cara para acadar a clasificación, xa que non se cedeu derrota ante os dous compricados do grupo. Só vencendo por máis de 4 goles se finalizaría primeiro, pero a pólvora tíñana mollada os amarelos dita mañá. Só os beizos collían idéntica sensación coa apócema centola -foto abaixo-. Vitoria sen apuros por 2-1.

Apócema centola

A nosa posición dependería do resultado entre Celtabirras e Boinas, cun claro pacto de non agresión entre eles, rematando co terceiro empate sen dianas da mañá. Os amarelos, mellores terceiros dos cinco grupos -empatados a 5 puntos con primeiro e segundo-, o que lles outorgaba o pase á fase final.

En resumo, custou xuntar ó persoal para comezar o camino da reválida é ó final entre lesións que foron aparecendo durante a mañá, trunfou a afouteza centola e os guerreiros que defenderon ó simbólico crustáceo, lograron que Javi Fonseca -cancerbeiro para a ocasión- só tivese que recoller o balón do fondo das mallas nunha só ocasión.

Noutra orde de cousas, mención especial a Mi Bendita Condena, outro colectivo de nova creación, que tivo unha pasaxe impoluta polo campo de Candeán, vencendo nos seus encontros, un deles ante os campións de 2015 e finalistas do 2016, os combativos Celtas do Verdugo.

Unha vez finiquitada a xornada deportiva, algún dos nosos acudiron a un establecemento da rúa Manuel de Castro, con outra peñas participantes na primeira fase, a degustar duns pinchos para desfrutar do fondo do evento, que é a convivencia entre celtistas. Organizada polos compañeiros de Natxo Insa, tamén tiveron presenza Merlegos, Irmandiños, Boinas Celestes, Le-Chuzas, Celtabirras.

Por Hugo Estévez Cividanes

RENOVACIÓNS E ALTAS 2017-2018

Boas Centolada e futura centolada!! Comezamos a tempada 2017-2018. Si, esa. A que lembraremos sempre polo título que imos conseguir na Copa do Rei e por clasificarnos pra Champions; esa na que beberemos ata a última gota de auga da Praza de América; esa na que seguiremos escribindo con letras douradas a nosa historia.

Pero antes toca pasar por caixa, rapazada. Diso non vos escapades. A ver se credes que o ritmo de vida que leva a vosa directiva finánciase só. 

Mais non vos preocupedes, que tampouco é moito, e aínda ides ter cartos para convidar a uns vasos (chisco, chisco). Outro ano máis, e xa van moitos, mantemos as cotas de sempre!! Podedes velas na táboa que acompaña este texto.

Para renovar ou tramitar a alta, tedes dúas vías: abonar as cotas en efectivo nos días que vos sinalaremos; ou ingresalas na conta bancaria Centola (a de Suíza non, a de aquí) que vos pasaremos por mail ou por whatsapp.

Vaaaaale, que si, que tamén temos uns agasallos pra vós... As renovacións ou altas que se tramiten antes do día 20 de agosto levarán un lote de cervexas Centolas!!!! Nese lote vai incluída unha tirada limitada, edición Benny McCarthy!!! Ademais, os cativos terán unha sorpresa exclusiva para eles.

Aproveitade a burbulla inmobiliaria que temos no fondo da ría e mudádevos!! Vinde a gozar con nós do mellor fútbol, da mellor compañía e da mellor xente da historia!!

#FaiteCentol@

#CeltismoEnPositivo 

Centolos Celestes, campións do Torneo de Peñas do Celta 2017

Non hai mellor brinde dunha década de celtismo en positivo que auparse ó escalón máis alto da Champions das peñas do Celta. Dende o fondo da ría, con afouteza e remontadas, acadamos a paparota da FdP -coma de costume-, que era ó que se viña e se tal, a gañar.

Foto de campións

O camiño foi abreviado. Neste ano a novidade foi a repesca para rechear a fase final a 16 equipos coma ata 2015 -o ano pasado era máis sinxelo pasar ás semifinais, xa que só había dous grupos-. Os compañeiros de Preferencia Celeste e de Le-Chuzas, foron ós que tivemos que derrotar para acceder directamente á fase final.

A mesma foi adiantada, xa que o día previsto disputarase o adiado Celta-Real Madrid ligueiro. Xogamos nun grupo de 3, trala retirada do campión en 2015 e finalista en 2016 (Celtas do Verdugo), o cal, aumentou considerablemente as posibilidades de ir xantar á Madroa de balde, xa que era un oso duro de lidiar.

Outra estampa do glorioso día

Comezamos ante o combinado "virtual" Siareiros.net, un encontro moi parello nos seus primeiros intres, cun afortunado gol á nosa favor antes do tempo de lecer e logo o doblete de Noé serviu para chegar ó 4-1 e facer moi valioso o empate ante a Peña Celtista de Salceda, que dobregara a Siareiros por 3-0 no primeiro xogo da mañá.

Para pechar mañá no campo do Meixoeiro, enfronte os mentados celtistas de Salceda. Encontro a cara de can, no que nos fixeron correr bastante e que se adiantaron tras un saque de esquina discutido. Tocaba épica nos derradeiros 30 minutos e así foi co carreirón de Richi e co doblete do killer Trajeta. Tocaba xantar, recuperación corporal e a cargar as pilas de cara ó tramo final do torneo.

Na semifinal tocounos Lío En Río -quénes nos derrotaran no Penedo da Moo no 2013 cun gol de falta a toque de pitido final-. Rápido collemos vantaxe co 2-0 a cargo de Iago, co que se chegou ó tempo de lecer. Gol de estratexia dos "líos" mediada a segunda metade e a manter a ínfima renda, xa que non fomos quénes de sentenzar no epílogo da semifinal (2-1).

Agardabanos á peña de Ribadavia para desputar a final (eles superaran sen problemas a Curva Celeste no campo do Chapela previamente). Anecdótico que xa cos colexiados sobre o céspede e o rival, a escuadra amarela, xacía cos seus homes derreados polo artificial de Candeán, amenizando a espera cunha birra centola. Tocaba aliñar a míster Pablo ás carreiras e saiu a cousa satisfactoria. Outro 2-0 ó descanso e intercambio de golpes na segunda metade -outro doblete de Trajeta-, para gañar o torneo por 3-2.

Apócema centola

Mención especial, á apócema máxica centola  -imaxe superior-, degustada dende o pasado domingo na previa do Celta-Athletic. E que serviu para dar folgos ós componentes do combinado amarelo nesta longa xornada de celtismo en positivo e fútbol de salón.

Voltamos o xoves perante a gran cita ante o Manchester United con balbordo e colorido celeste dende primeira hora da tarde ata a madrugada do venres nos aledaños de Balaídos.

Por Hugo Estévez

Outra noite pra lembranza

Este pasado mércores 25 de xaneiro, tiñamos un gran desafío a beiras do Lagares: eliminar ó campión europeo e mundial do torneo do KO. Para iso, tiñamos que tratar de non empeorar o fantástico tanteo acadado unha semana antes no coliseo madridista (1-2).

foto tralo histórico pase a semis

E para unha misión deste calado, como non un recibimento con bengaleo, quedando ás sete do serán para ir meneando as bandeirolas e repartindo os artefactos "pirotécnicos". Ateigando a rotonda Marcador-Tribuna de seareiros celestes, xa que o paso do autobús demorouse un cuarto de hora do previsto e cambiando o percorrido agardado -baixando pola rúa Val Miñor e bordeando o coliseo pola bancada de Río ata entrar pola saída da rúa Olímpicos-, como fronte o Sevilla nas semifinais da tempada pasada.

Bengaleo previo

Nosos votos para o Manuel de Castro 2016

Vía Atlántico.net

68 soci@s da nosa peña formalizaron a súa valoración respecto ó popular "certame" anual Manuel de Castro (sexta edición), onde se vota cales foron os xogadores máis relevantes do noso Celta, durante o ano natural que remataba o sábado pasado. Vía whatsapp, os centolos foron mostrándose durante a véspera de Fin de Ano -seriedade nas estimacións, polo xeral-.

O gañador -de xeito abrumador- foi Iago Aspas (con case a metade dos puntos repartidos: 299), quén sucedía a  Fabián Orellana (194 puntos) -maior votado en 2015-. Secundado polo imprescindible e equilibrador Pablo Hernández (126 puntos). E na terceira posición, a revelación do presente curso, o serbio Radoja (55 puntos). Logo, en menor medida, foron puntuados: Wass (33), Güidetti (28), Orellana (26), Hugo Mallo (20), Cabral (11), Sergio (5), Jonny e Bongonda (3), Sergi Gómez (2) e Roncaglia (1).

www.yojugueenelcelta.com

Esmiuzando un pouco máis na sondaxe, o máis lembrado foi Iago Aspas, xa que recibiu puntos en 63 ocasións das 68 vertidas (otorgándolle o primeiro posto 56 dos 68 centolos participantes). O momento de dulce do moañés trasládase ás valoracións do afeccionado. Lembremos que o ano pasado, só 6 puntos levou, xa que contaba cun papel menos principal que no presente.

Falando de crecemento están a citada revelación serbia, quén pasa de 5 a 55 votos. Os nórdicos Wass e Güidetti ascenden ó cuarto e quinto posto respectivamente, rondando ambos a trintena de puntos e levando ámbolos dous o ano pasado un só. Tamén mellora Hugo Mallo, chegando ó sétimo posto.

E se imos ás "decepcións" poden estar Orellana e Jonny. O chileno de gañar hai un ano, reduce a súa puntuación sete veces. Bastante culpa teñen as sucesivas lesións que ven padecendo o xenio andino. No tocante ó  de Matamá, pesa moito o seu rendemento deportivo mermado nas derradeiras datas, o cal tamén se trasladou á baixa, pasando de 67 tantos a 3.

Se queredes seguir as noticias do premio e consultar o vencedor destrucción ano, tendes que visitar www.moiceleste.com, alí atoparedes tódala información relacionada.

Por Hugo Estévez

Centolos Celestes, na Fase Final do XX Torneo da FdP do Celta (2016/2017)

Esta mañá do 12 de outono, os nosos rapaces acadaron a terceira clasificación consecutiva para a Fase Final do Torneo da Federación de Peñas do Celta, que conmemora a súa vixésima edición compartindo fútbol e intres de celtismo entre os seareiros do equipo de Balaídos. O emprazamento foi o habitual das tres citas anteriores do combinado amarelo: as instalacións de A Madroa, nunha alternancia climática, a que por momentos foi solleira, noutros aneboada e tamén coa presenza das primeiras precipitacións da devandita estación.

Arrincando o 2016 con sabor centolo

A nosa peña participou o pasado sábado 2 de xaneiro, no I Torneo de Aninovo, que organizaron os compañeiros de Arribada Celeste, exercendo coma anfitrións, ao igual que nos estivais Memoriais "Jaime Vilar Estévez". Os outros dous convidados foron o Colectivo Nós e Comando -mellor combinado do evento-, que sustituía a Irmandiños (a quénes lles foi imposible asistir).

Unha carta dende o fondo da Ría.

Entre todos fixémolo posible.

Os tempos son chegados. Dende o día 27 de nadal de 2015, a Peña Celtista Centolos Celestes de Vigo ten un novo Presidente, o terceiro da súa modesta historia. Polo que xa como ex-presidente, quería despedirme de todos e todas vós aproveitando para agradecervos tantos e tan bos momentos vividos na vosa compaña.

Dende a súa fundación, Centolos Celestes foi para min coma un soño feito realidade, coma un fillo que medraba e se facía máis bonito co paso dos anos. Fundar unha peña, e que o primeiro que viva coma peñista sexa un descenso non é, que digamos, o mellor comezo posible. Pero así foi, e mentres o vello municipal se valeiraba ós poucos, Centolos comezaba a medrar pasiño a pasiño. Sempre quixemos ser unha peña diferente, innovar pero respetar a nosa historia ó mesmo tempo, facer sempre algo máis, facer sempre algo diferente. E abofé que o conseguimos. Fumos os primeiros en tantas cousas, que é un orgullo botar a vista atrás para comprobar todo o conseguido, e deixar que se escape un gran sorriso.

Unha peña non é unha illa. Moita xente que non formaban parte de Centolos estivo ahí dende o principio. Todos eses homes e mulleres que forman esta gran familia Celtista. Xentes que traballaban arreo nunha ou noutra peña, amigos de aquel ou daqueloutro bar, compañeiros que escribian nun ou noutro medio de comunicación, membros da Federación de Peñas, e incluso do propio clube. Persoas que nos axudaron e nos acolleron, que nos deron pulo e cos que compartimos moitas grandes xornadas. Todo o que rodeaba ó Celta era inversamente proporcional á situación do clube, supoño que esa soidade fixo que a unión entre aqueles poucos homes e mulleres fose máis grande e pura. Pasamos a mala dor do noso clube xuntos, pero saímos adiante, entre todos.

Quero lembrarme de todos, pero sobre todo dos amigos que xa non están. Aqueles cos que compartín unha amizade, unha conversa, unha confesión, un xantar ou unha risa e que agora están empuxando ós celestes dende o propio ceo. Grazas.

É certo que teñen moita importancia as ideas, os soños, pero para conseguilo son precisas as persoas que os leven a cabo. En Centolos Celestes nunca me puiden queixar de falta de implicación. Dun xeito ou de outro, sempre tiven a fortuna de contar cun gran equipo o meu carón, na directiva sí, pero na totalidade da peña tamén. Quero agradecer a todos, tamén ós que xa non nos acompañan pero que nalgún momento formaron parte desta peña, o seu esforzo e traballo en defensa de Centolos Celestes.

Grazas a tod@s!

Recibide unha forte aperta, coma sempre, dende o fondo da Ría.

Alejandro Costas Vila.

O noso derbi 2015: Diversión malia derrota.

No camiño de ida todo era optimismo.

Un ano mais, coma non podía ser doutro xeito, a Peña Celtista Centolos Celestes de Vigo estivo presente no derbi Galego.

Non foi doado desta vez, xa que os problemas para a adquisición de entradas foron tremendos. Poucas unidades á venda, todas por billeteira e todo isto aconteceu dun día para o outro. A pesar das enormes dificultades en Centolos o bus estaba practicamente cheo.

Como tamén ben sendo habitual, esta viaxe foi de balde para o membros da peña, que só tiveron que facer fronte ós 30€ da entrada.

A xornada comezou dun xeito moi Galego, cun xantar a base de cocido e viño do país, dese que mancha os beizos e quenta o corpo. Os folgos medraban e os mozos e mozas preparábanse para unha viaxe que é curta pero sempre moi intensa. Entre fume e lume, cervexas e petardos, a expedición Centola partiu puntual dende o vello Balaídos.

Coma sempre dicimos, o que pasa no autobus, queda no autobus, pero bueno, neste caso temos que citar algo importante, unha promesa que viña de lonxe, das frías terras de Rusia para quentarnos e animarnos: O noso Centolo "Sergio" agasallounos cunha botella de vozka (ritual para bebela incluido) e cun CD grabado por el mesmo con música "para a batalla de Riazor" que gustou e moito entre os presentes.

Unha vez chegados á cidade herculina, sen incidentes, a festa e a ledicia inicial foron trocando, co paso dos minutos en tristeza e desazón, por mor do xogo e do resultado do encontro. Foi un mal partido, en todos os sentidos e contra o peor rival posible. Unha derrota dura que esperamos revertir na segunda volta en Vigo.

Unha vez mais, ali estivemos, viaxando coma non, dende o fondo da Ría.

Centolos Celestes, na Fase Final do torneo da FdP 2015/2016

O pasado luns 12 de outubro, a nosa peña clasificouse para a Fase Final do clásico torneo das peñas do Celta 2015/2016, organizado pola Federación das mesmas, por segundo ano consecutivo. Desta volta, encadrados no grupo B, cos amigos da Louriña de Os Zoqueiros e cos camaradas de previas e viaxes das terras do Deza, Os Siareiros Dezaos. 

Celtismo e amizade, a nota predominante

A predisposición dos grupos da Fase Final, xa estipulada no sorteo da Fase Previa -desta volta con menos peñas asiduas do habitual, supoño que pola data prematura da xornada-, volve a encadrarnos cos veciños de bancada, o Colectivo Nós (ós que vencemos o ano pasado de xeito apurado por 3-2), vellas rencillas coa peña celtista de Arbo (bicampioa en 2013 e 2014) e a formación de nova creación, Ramallosa-Canido, que chegou coma nós ás semifinais da pasada edición.

Novos folgos na centolada

Gorxas novas relegando ó presi á segunda fileira

O pasado sábado 29 de agosto, daba comezo a tempada centola, na súa mini-sección de "macro-previas". Anteriormente, o domingo 23 do devandito mes xa houbera unha pequena quedada por mor da estrea ligueira do Celta no Ciutat de Valencia, nun encontro que se desputaba á última hora da tarde, tamén coa escusa de comezar coa campaña de altas e renovacións da agrupación centola. O punto de encontro, un clásico xa coñecido polos membros da peña, o Serodio, sito nunha das rúas transversais entre as avenidas de Castelao e Florida.

En dito establecemento, proseguiuse co preceptivo procedemento da recolleita de aboados do combinado de Marcador Impar (a peche de edición xa se encamiña cara o importante centear de membros), amenizado cuns saborosos e variados pinchos para facer máis pracenteira-se cabe- a velada, acompañados de variantes do líquido elemento, que sempre axudan para balbordear con máis folgos na bancada aupando ós nosos. Máis sendo a estrea e coa longa travesía estival sen animar ó noso Celtiña, había que comezar a por o listón, alomenos no punto co que rematamos a 2014/2015 (moi ilustrativos no espacio deportivo de Canal + de "El Día Después" en plena euforia polo que entón semellaba a virtual volta ó inferno do Coruña).

Centolos Celestes, subcampións do Memorial Jaime Vilar Estévez de Baiona.

Os dous finalistas da presente edición

Como é habitual tódolos veráns, en torno á festividade do patrón de Galicia, dispútase o Memorial Jaime Vilar en Baiona, nun torneo organizado pola peña local de Arribada Celeste, coa estreita colaboración dos amigos do rapaz malogrado que lle da nome ó evento-homenaxe.

Este ano contouse coa novidade de engadirlle á gran nova da solidaridade do presente no campo do Aral, colaborando cunha ONG nunha recollida de alimentos non perecedoiros e tamén coa protectora de animais "Bai.senpulgas", noutra recolleita de colares, correas, penso, produtos de limpeza, comedeiros e demáis utensilios para cans e gatos.

Centolos Celestes, outro ano máis "celteando"

A instantánea do broche da tempada

Este pasado sábado 23 rematou a tempada celeste 2014/2015 e podemos dicir que tamén a centola. Agora un par de meses de vacacións, para voltar con forzas a finais de xullo, coa posible presenza dos amarelos en Baiona, no campo do Aral, no coñecido Memorial Xaime Vilar, organizado polos compañeiros de Arribada Celeste.

Cun partido ás 18.30 horas no Vello Balaídos -xa era sen tempo de tanto horario de curuxas-, había que organizar o derradeiro evento gastronómico da tempada, coloquialmente coñecido como a comida de turno. Case unha trintena de comensais se citaron no Serodio para quecer motores para a previa-desenlace. Acompañáronnos algúns membros de Siareiros Dezaos -repetirán para a vindeira tempada, estou seguro-. Javi Vaz, arrincouse con outro monólogo dos seus na sobremesa, baixo o lema "comendo á beira de Pepón, hai máis de un caghallón". O home de Vía TV pasoulle a patata quente ó pobre tesoreiro, que a proba de tal "sarao", así se mostrou como voceiro centolo do malestar co Barça durminte e condescendente co Coruña, xa entrada a noite.

Centolos Celestes: Terceiros no Campionato da Federación de Peñas Celtistas 2015



Festa no vestiario amarelo tras pasar a semifinais.

O pasado venres 1 de maio, o equipo amarelo conseguiu o seu maior logro no prestixioso torneo da Federación de Peñas do Celta: o terceiro posto. É unha honra formar parte do pódium dos 24 "grupos oficiais de afeccionados" (por informalmente chamalos) que ano a ano danlle caché a esta desputa "oficial". 

Foi un longo e chuvioso día, atarefados a darlle patadas ó balón cun campo case impracticable e coa inagardable presenza da néboa do Monte Vixiador e da Madroa. Voltamos a repetir sede na segunda fase, o altío campo de Chapela. Ademáis, os dous rivais clasificados do noso grupo, as peñas Hugo Mallo e A Ría, foron tamén adversarios nesta rolda. Os cuartos en discordia foron os compañeiros de Le-chuzas Celestes, cun amigo e ex-centolo coma Javitxu na súa batuta institucional.

Un ruso, un portento da verborrea e outro roubo do Madrid no VIII aniversario de Centolos

Vaz nos seus minutos de gloria

Este pasado sábado 25 de abril, conmemoramos no Hotel Hesperia, sito na céntrica rúa viguesa de Florida, a oitava onomástica da nosa peña, Centolos Celestes. Case dous meses despois da súa primeira data asinada, ó fin conseguimos realizar dita celebración. Principalmente por aquel troco de horario no partido ante o Athletic, que nos rompeu os esquemas a todos e privou a moitos de asistir na pasada fin de semana ó evento. Noutros sábados foi imposible intentar cadrar o cumpreanos do colectivo crustáceo, por mor do idilio actual entre Mediaset e o Celta e outras festividades populares. Xunto coa masa centola, acompañáronnos compañeiros das peñas Canteira Celeste, Natxo Insa, Preferencia Celeste e en maior grao, Siareiros Dezaos.